6º CURSO 1.10

25 - 29 NOVEMBRO

 

Bo día !

 

A- FRAUTA.

1- Medimos.

2- Entoamos.

3- "Tocamos"

 

B- A BANDA DE MÚSICA.

En Galicia temos unha grande tradición de bandas de música.

Unha banda é un conxunto instrumental formado por instrumentos de vento e percusión, aínda que ás veces inclúan instrumentos de corda, formando, nestes casos, unha banda sinfónica.

O repertorio das bandas actuais inclúe unha grande variedade de estilos entre os que están: o tradicional, as bandas sonoras de cine, a música contemporánea, a clásica...

Agora picade na imaxe inferior para ver unha presentación de slideshare sobre as bandas.

 C- AUDICIÓN.

Para rematar a clase de hoxe, escoitaremos á Banda de Música de Vilagarcía de Arousa interpretando "Around the world in 80 days", de Otto Schwarz.

5º CURSO 1.10

25 - 29 NOVEMBRO

 

Bo día !

 

A- FRAUTA.

B- INSTRUMENTOS P.A.D.

Os instrumentos de percusión de altura determinada son aqueles que poden producir notas coas que interpretar melodías.

A diferencia cos instrumentos de altura indeterminada, radica en que nestes últimos só se poden producir ritmos, non melodías.

Uns emiten o seu son ao golpear unha peza de metal ou madeira coas baquetas e outros soan ao golpear unha membrana nunha das súas caras.

Na imaxe que segue podedes ver os instrumentos máis coñecidos desta familia.

C- AUDICIÓN: MÚSICA PROGRAMÁTICA OU DESCRITIVA.

A música descritiva é aquela que, como o seu nome indica, trata de describir musicalmente unha paisaxe, escena ou sentimento.

Dentro deste tipo de composición imos escoitar hoxe "A mañá", do músico noruegués Edvard Grieg, pertencente á súa obra "O retorno de Peer Gynt"

4º CURSO 1.10

25 - 29 NOVEMBRO

Bo día !

AVISO IMPORTANTE: A PRÓXIMA SEMANA PREGUNTAREI A PARTITURA "A RITMO DE FOXTROT"

 

A- FRAUTA.

Hoxe retomamos esta partitura para que a acabedes de repasar ben. Prestade atención á posición do voso corpo durante a práctica.

B- O COMPÁS BINARIO.

O compás é unha indicación que nos di cantas partes ten cada "fragmento" da partitura. Eses fragmentos están separados polas liñas divisorias, que son as que dividen todos os compases que forman a partitura.

Na partitura de arriba, por exemplo, temos un "dous por catro", que nos indica que cada compás está formado por dúas partes iguais. Cada unha desas partes podémola completar cunha negra (ou algo de igual valor), e isto fai que todo o compás se complete cunha branca.

O primeiro pulso do compás é a parte máis forte, onde recae o acento, e o segundo pulso é débil.

Pois ben, a este compás formado por dúas partes chamámoslle compás binario e indicámolo así:

C- AUDICIÓN.

Hoxe temos por aquí a marimba, un dos instrumentos da familia de percusión (idiófono) de altura determinada. 

A ver se sodes quen de recoñecer a canción !

3º CURSO 1.10

25 - 29 NOVEMBRO

Bo día !!

 

 

A - AS NOTAS FA E MI.

Hoxe temos por aquí dúas notas novas da frauta: Fa e Mi.

 

Antes de nada lembrade como temos que coller a frauta:

 

1- Lombo ben dereitiño.

2- Man esquerda arriba.

3- Man dereita abaixo.

4- Polgar esquerdo tapando o burato traseiro.

5- Polgar dereito nas "raias"

 

                              

                   

Non vos esquezades de soprar suavemente para que a frauta soe sempre moi doce.

 

B - COPIAMOS A PARTITURA.

Comezamos cunha partitura de catro notas: la, sol, fa, mi. Repartide cada pentagrama en catro compases IGUAIS medindo o espazo cos dedos. Ao final pechamos a partitura coa dobre barra.

 

   
C- A PERCUSIÓN NA ORQUESTRA.

Agora temos aquí un pequeno vídeo dos percusionistas dunha orquestra sinfónica. Nel poderedes ver os momentos previos á interpretación no escenario, a afinación de cada timbal, os pratos, a marimba, pandeireta, caixa, triángulo, bombo...

   Espero que o desfrutedes.

 6º CURSO 1.9

18 - 22 NOVEMBRO

 

Bo día !

 

A- CANTAMOS: "O MAGOSTO"

B- FRAUTA: HIMNO DA ALEGRÍA (Sol M)

Agora toca comezar cunha partitura nova. Para comezar collede o voso caderno e copiádea nel, poñendo moita atención para non saltar, ou repetir, ningún compás nin equivocar ningunha nota.

C- AUDICIÓN.

Esta semana escoitaremos "O Inverno",  de Antonio Vivaldi, pertencente á súa obra "As catro estacións"

 

Esta obra agrupa catro concertos que tratan de describir con música, cada unha das catro estacións do ano, de aí o seu nome.

Agora deixo un fragmento do "Inverno"

 5º CURSO 1.9

18 - 22 NOVEMBRO

 

Bo día !

 

A- CANTAMOS: "RAP DO MAGOSTO"

B- COPIAMOS: HIMNO DA ALEGRÍA (Do M)

Toca copiar unha nova partitura. Prestade moita atención á tarefa, xa que ás veces é fácil saltar algún compás ou equivocar algunha nota por non estar totalmente concentrados no que facemos.

C- AUDICIÓN.

Agora imos escoitar unha obra de Ludwing Van Beethoven.

A obra de hoxe é a Sinfonía nº 9 (Coral). O seu nome é debido á presencia de voces humanas nunha sinfonía, cousa pouco habitual naquel tempo. Unha adaptación desta obra é actualmente o himno europeo, seguro que a coñecedes.

Se ides ao minuto 5.20 poderedes escoitar a parte máis coñecida da obra.

4º CURSO 1.9

18 - 22 NOVEMBRO

 

Bo día !

 

A- CANTAMOS.

B- COPIAMOS E ANALIZAMOS A PARTITURA.

Collede o caderno para copiar esta partitura. Logo cantaremos, veremos as partes que compoñen cada compás, a duración de cada figura e poñeremos nome ás notas.

C- O CUARTETO DE CORDA FRETADA.

Os instrumentos de corda fretada son aqueles nos que facemos vibrar as cordas cun arco, aínda que ás veces pinzamos as cordas cos dedos en pizzicato.

O arco é unha vara de madeira na que se coloca crina de cabalo coa que fretar as cordas.

Estes instrumentos teñen catro cordas e as partes que podedes diferenciar nesta imaxe.

3º CURSO 1.9

18 - 22 NOVEMBRO

 

Bo día !

 

REPASO:

A- PERCUSIÓN CORPORAL.

Xa sabedes que podemos empregar o noso corpo como un instrumento de percusión.

Agora prestade moita atención á partitura porque imos facer ritmos empregando as diferentes partes do noso corpo, pero primeiro imos comprobar, compás por compás, que a partitura non teña ningún erro.

B- O VIOLÍN.

O violín é o instrumento máis pequeno do cuarteto de corda fretada.

Os instrumentos de corda fretada son aqueles nos que facemos vibrar as cordas cun arco, aínda que ás veces pinzamos as cordas cos dedos en pizzicato. Teñen catro cordas e as partes que podedes diferenciar nesta imaxe.

C- AUDICIÓN.

Agora escoitade esta peza do compositor estadounidense Leroy Anderson: "Plink, Plank, Plunk".

2º CURSO 1.9

18 - 22 NOVEMBRO

Bo día !

 

A- CANTAMOS: "Eu son un artista"

A primeira actividade de hoxe será cantar esta canción de Mamá Cabra. É unha canción moi faciliña de recordar, na que teredes que facer que tocades o instrumento do que vai falando en cada momento.

 

Recordade que cantar e berrar non son a mesma cousa.

 

B- COPIAMOS A PARTITURA.

Agora tedes que coller o voso caderno pautado e copiar esta pequena partitura.

Recordade os tres pasos para facer a clave de sol. 

Facede catro compases iguais en cada pentagrama.

Coidado coas liñas divisorias.

Non vos esquezades da dobre barra ao final.

Cando rematedes de copiala, poñédelle o nome debaixo de cada nota.

 

C- MÚSICA E CINE DE ANIMACIÓN.

Hoxe temos por aquí a Beethoven coa súa 5º Sinfonía. É un pequeno fragmento, duns tres minutos de duración, da película "Fantasía 2000".

   Espero que a desfrutedes !!

 

1º CURSO 1.9

18 - 22 NOVEMBRO

Bo día !

 

A- CANTAMOS: PLÁTANOS.

B- A CLAVE DE SOL.

Agora temos que facer un click na clave de sol para practicar como se fai. Podémola facer primeiro na propia aplicación e logo  colleremos un lapis e farémola no caderno. Recorda que son tres os pasos que tedes que seguir:

   1- Cuncha de Gary.
   2- "Ele"
   3- Mango do paraugas.

 3º CURSO 1.8

11 - 15 NOVEMBRO

 

Bo día !

 

A- CANTAMOS.

 

B-  FRAUTA.

O primeiro que temos que facer agora é copiar esta partitura e poñerlle o nome ás notas. Logo toca seguir co seu  estudo e, para que vos sexa máis sinxelo, queda un pouco máis abaixo unha gravación dela.

Na gravación da partitura, se a ampliades a pantalla completa, poderedes diminuír a velocidade na rodiña dentada de abaixo á dereita.

 

C- AUDICIÓN.

Por último toca escoitar un pouco de música.

O "Valse da Bela Durminte" que escoitaremos hoxe é unha obra dun compositor ruso chamado Tchaikovski. Estou seguro que xa o escoitastes algunha vez, facede click no vídeo de abaixo para comprobalo.

 

 

 6º CURSO 1.8

11 - 15 NOVEMBRO

 

Bo día !

 

A- CANTAMOS.

Xa estamos no tempo do magosto e imos escoitar e aprender esta canción que nos fala desta festa tan tradicional de Galicia.

B- OS TIPOS DE VOCES.

Podemos clasificar as voces humanas, tanto as masculinas como as femininas, en función da súa altura. Faremos entón, dous grupos ben diferenciados, con tres subtipos cada un:

Se as ordenamos todas de agudo a grave quedarían do seguinte xeito:

1- Soprano.

2- mezzosoprano.

3- Contralto.

4- Tenor.

5- Barítono.

6- Baixo.

A nosa voz, a medida que medramos, vaise facendo máis e máis grave. Este cambio faise moi evidente cando chega a pubertade, sendo máis notorio nos varóns.

Estas voces poden agruparse, ou non, con diferentes instrumentos, dando lugar a distintos tipos de obras musicais:

- Vocal, na que so aparecen voces.

- Instrumental, na que só aparecen instrumentos.

- Mixta, aquela que agrupa voces e instrumentos.

C- AUDICIÓN.

Agora imos escoitar unha obra de Ludwing Van Beethoven.

A obra de hoxe é a Sinfonía nº 9 (Coral), concretamente o 4º movemento.

O nome desta obra, Coral, é debido á presencia de voces humanas nunha sinfonía. Unha adaptación desta obra é actualmente o himno europeo, seguro que a coñecedes.

No vídeo poderedes ver unha ficción cinemátográfica de como puido ser a estrea desta obra no seu tempo. Fixádevos nas caras do público cando comeza a cantar o coro, quedan todos abraiados xa que era infrecuente que un coro formara parte dunha sinfonía.

Se ides ao minuto 5.20 poderedes escoitar a parte máis coñecida da obra.

 5º CURSO 1.8

11 - 15 NOVEMBRO

 

Bo día !

 

A- CANTAMOS.

Xa estamos no tempo do Magosto así que imos escoitar e aprender este rap, de Paco Nogueiras, que nos fala desta festa tan tradicional en Galicia.

 

B- LINGUAXE MUSICAL.

Hoxe toca falar do compás de dous por catro.

O compás de dous por catro é un compás binario xa que ten dous pulsos. O primeiro pulso é forte (é o que leva o acento) e o segundo débil.

A figura que completa cada pulso é a negra, por iso dicimos que é a figura unidade de pulso.

A figura que completa cada compás é a branca, por iso dicimos que é a figura unidade de compás.

C- FRAUTA.

Copiamos a seguinte partitura no caderno de música.

Fixádevos que a partitura comeza cun compás incompleto que carece do pulso forte, isto é o que se coñece como anacruse.

2º CURSO 1.8

11 - 15 NOVEMBRO

Bo día !

 

A- REPASAMOS.

Comezamos a clase de hoxe cantando a canción do magosto deste ano: Trece lúas.

 

 

B- ESCRIBIMOS UNHA PARTITURA.

Agora imos copiar unha partitura no caderno. Para elo faremos a clave de Sol e logo dividiremos o pentagrama en catro compases iguais medindo cos dedos. Colocaremos dúas negras en cada compás.

C- PERCUSIÓN EN DOUS GRUPOS.

 1º CURSO 1.8

11 - 15 NOVEMBRO

Bo día !

 

A- CANTAMOS: TRES CASTAÑAS POLO CHAN.

 

B- PERCUSIÓN EN CÍRCULO.

C- LIÑAS E ESPAZOS.

 4º CURSO 1.8

11 - 15 NOVEMBRO

 

Bo día !

 

A- CANTAMOS:

B-  FRAUTA.

Como dixemos o último día, temos que seguir coa práctica da partitura "A ritmo de foxtrot". Non vos esquezades deses 10-12 minutiños de práctica diária na casa que me prometestes de luns a venres.

Recordade que na gravación da paritura, se a ampliades a pantalla completa, poderedes diminuír a velocidade de reprodución á metade na engranaxe da configuración (na rodiña dentada de abaixo á dereita).

 

C- AUDICIÓN.

Hoxe imos escoitar a L. V. Beethoven.

Beethoven foi un dos máis afamados compositores. Naceu en Alemaña, aprendeu música dende moi novo e foi quedando sen oído pouco a pouco ata quedar xordo.

Unha das súas obras máis coñecidas é este Septimino que compuxo no ano 1800. Escoitádeo con atención fixándovos en cada instrumento: violín, viola, violoncello, contrabaixo, fagot, trompa e clarinete.